ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 71, 21.05.2019/

Александра Пушкарева: “Үз эшемнең остасы  булырга телим”


Апалары булган кызлар аңлар: кечкенә чакта еш кына аларны кабатлап, бизәнеп-ясанып, аларча киенеп, чәчләр ясап кылана идек. Ә менә Александра Пушкарева балачак шуклыгын булачак һөнәр иткән! Саша Халык­ара сервис көллиятендә косметолог белгечлегенә укый. “WorldSkills” эшче һөнәрләр чемпионатында “Эстетик косметология” компетенциясендә катнаша.

4-2
Александра – Казан кызы. Хәзер ул Халыкара сервис көллиятендә III курста белем ала. Укудан тыш спорт белән шөгыльләнә. Аның “WorldSkills” хәрә­кә­тенә килеп кушылуына да шушы көллияттә укуы “гаеп­­ле”.


– “WorldSkills” хәрәкә­те­нә 2016 елда килеп кердем. Миңа ул вакытта 16 яшь, I курс студенты идем. Әл­бәт­тә, башта бу хәрәкәт, чемпионат турында берни белмә­дем, көллияттә беренче тапкыр ишеттем дияргә була. Укытучыбыз катнашырга тәкъдим иткәч тә, куркып калдым, катнашмаска булдым. Мәктәп бусагасын яңа атлап чыккан гына идем бит әле! Җаваплылык шүрләт­кәндер, – дип искә алды Саша. – Чемпионатта оста буларак катнашмасам да, үземне волонтер буларак сынап карадым. Төркеме­бездән 6 кызны ярышларга волонтер итеп сайлап алдылар. Чемпионатның ни икәнен үз күзләрем белән күргәч, күңелдә очкын кабынды! Үз белгечлегем буенча катнашучы кызларны күреп, таң калдым: алар ак костюмнан, күзләрендә – дәрт, ут, үз эшләренең осталары! Кызлар макияж, бит массажы, маникюр серлә­рен белә иде инде. Шуларга карап: “Нигә катнашмадым инде?” – дип үкенеп тә йөр­дем. Киләсе елга катнашам дип, үземә сүз бирдем. Икен­че курста укыганда, укытучыбыз янә чемпионатта катнашырга тәкъдим итте. Мин инде мөмкин­лекне кулдан ычкындырмадым.


– Башта көллияттә ярыш­лар булгандыр?


– Әйе, көллиятара ярыш­лар булды. Шунда катнашучылардан өч кешене тө­бәкара чемпионатка сайлап алдылар. Мин дә исем­леккә эләктем. Безгә ике модуль тәкъдим ителде: маникюр һәм макияж. Тө­бәк­ара чемпионатта да уңыш­лы чыгыш ясадым – 1 нче урынга лаек булдым. Әле дә исем­дә: шул миз­гелдә аякларыма кадәр калтырады. Яраткан эшең­не эшләп, нин­дидер нәти­җәгә ире­шү­нең олы ләззәт икән­леген шунда аңладым.


– Көньяк Сахалинда уз­ган чемпионатта да катнаштың дип беләм.


– Төбәкара чемпионаттан соң Төмәндәге ярышларда катнашып, 3 нче урынны яуладым. Илкүләм чемпионатка шуннан юл алдым. Сахалинда узган җәйге милли чемпионатка әзер­лек бик көчле булды. Ир­тәнге 9дан кичке 5кә чаклы күнек­мәләр эшли идек. Көл­лият­тән чыкмадым да диярлек. Дус-ишләр ял итә, су коена, ә мин көне-төне әзерләнәм. Юкка түгел! Ил­күләм чемпионатта 2 нче урынны яуладым. Шуннан соң җыелма командага чакырдылар. Хә­зер мин – команданың ки­ңәйтелгән составы вәки­ле.


– Бу компетенцияне ни өчен сайладың?


– Әлеге һөнәр миңа яшь­тән үк кызыклы һәм якын дияр идем. Минем апам бар. Ул бизәнеп-ясанып мәктәпкә киткән чакта, мин өйдә кала идем. Әлбәттә, ул китүгә, аның бизәнгечләре минем кулга эләгә! Рәхәтләнеп буянам! Үкчәле туфлиләр киям, чә­чемне ясаган булам, аны кабатлыйм, имеш. Зурая башлагач, бу кызыксынуларымны булачак һөнәрем итәргә уйладым. Минем дә үз эшемнең остасы буласым килде.


– Ярышларга әзерләү­че остазларың белән дә таныштыр әле.


– Остазым Елена Евгеньевна – иң яхшы, иң сабыр һәм иң түземле компатриот (белгеч, укытучыларын шулай дип йөртәләр – Ч.Г.). Ул – искиткеч кеше! Миндә булган барлык белемнәр дә – аннан. Ирешкән уңышла­рым – аның көче, эше, укытуы нәтиҗәсе. Шулай ук җыел­ма команда вәкиле булган белгеч тә мине күп нәрсәгә өйрәтте.


– Августта узачак чемпионаттан ниләр көтә­сең?


– Ярышларның Казанда узуына сөенеп туя алмыйм. Чемпионат узачак мәйдан­чыктан мин кайтып та кер­мәм, мөгаен. Көне-төне шун­­да булырга әзер! Башкалар ничек катнашканны күзә­тергә, тәҗрибә уртаклашырга, өйрәнергә телим. Без җиңәрбез дип ыша­нам.

Хәзер  Александра – Мәс­кәүдә. Ул анда косметология юнәлеше буенча ITEC халыкара дипломын алырга әзер­ләнеп йөри, шуңа укулар уза.

(“Ватаным Татарстан”,   /№ 60, 24.04.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!