ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 117, 17.08.2018/

Хатын-кызлар да тик утырмый

 
Түрәләр узган елгы керемнәре турында хисап тотуны дәвам итә. Илбашы, федераль дәрәҗәдәге министрлар һәм Дәүләт Думасы депутатларыннан соң республика парламенты вәкилләренең дә күпме акча эшләве билгеле булды. Арада бер ел эчендә керемнәрен җиде тапкыр арттырганнары да бар.

4-3
Татарстан Дәүләт Советы депутатларының узган елгы керемнәре турында билгеле булды. Былтыр “Кулон” ЯАҖ генераль директоры Альберт Фәхретдинов барысыннан да күбрәк акча эшләгән әнә. Ул ел дәвамында 604,6 миллион сум керем алган. Хатыны исә гаилә казнасын 14,3 миллион сумга баеткан. Чагыштыру өчен, алдагы елны Фәхретдиновлар гаиләсенең уртак кереме 90,2 миллион сум тәшкил иткән булган. Депутатлар арасында беренче өчлеккә “СМП-Нефтегаз” АҖ генераль директоры киңәшчесе Фоат Комаров (427,6 миллион сум) һәм “ТрансТехСервис” компаниясенең директорлар советы рәисе Вячеслав Зубарев (407,3 миллион сум) та эләккән. Сүз уңаеннан, 2016 елгы декларация нәтиҗәләре буенча Зубарев беренче урында булган. Ел дәвамында депутатның акча янчыгы өчтән бергә диярлек саеккан. “Татнефть” ГАҖ генераль директоры Наил Мәганов – дүртенче, “Казан май комбинаты” АҖ директорлар советы рәисе Дмитрий Самаренкин исә бишенче урында. Алар ел дәвамында 138,6 миллион сум һәм 133 миллион сум керем алган.


“Татнефть” ГАҖ генераль директоры урынбасары Рөстәм Хәлимов былтыр 126,2 миллион сум акча эшләгән. Ул – алтынчы урында. Иң күп керем алучы хатын-кыз депутат җиденче баскычта. “Татсоцбанк” АҖ идарәсе рәисе Анастасия Колесова былтыр 94,9 миллион сум керем алган. Беренче унлыкка “Татнефть” ГАҖ генераль директоры урынбасары Рөстәм Мөхәмәдиев (91,5 миллион сум), “Татнефть”нең “Ямашнефть” нефть һәм газ чыгару идарәсе җитәкчесе Виктор Смыков (70 миллион сум), Казан вертолет заводының элеккеге җитәкчесе Вадим Легай һәм “Татнефть” ГАҖ генераль директорының тагын бер урынбасары Ринат Шәфигуллин (һәркайсы 68 миллион сум) да эләккән.


2016 елгы рейтинг белән чагыштырганда, иң бай депутатлар исемлегеннән ПСО “Казан” генераль директоры Равил Зиганшин (ел дәвамында кереме 163,5 миллион сумнан 34,4 миллион сумга кадәр кимегән), “Бәхетле” кибетләр челтәре хуҗасы Мөслимә Латыйпова (ел дәвамында кереме 109,8 миллион сумнан 32 миллион сумга кадәр кимегән) төшеп калган. Беренче унлыкта “Татнефтепродукт” холдингы генераль директоры Рөстәм Сабиров, “Газпром межрегионгаз Казан” генераль директоры Ринат Ханбиков, “Агро-Инвест” оешмасы генераль директоры Рәис Сөләйманов та юк. Республика депутатлары арасында былтыр Ксения Владимирова (0,8 миллион сум) иң аз акча эшләгән.


Парламент җитәкчесе Фәрит Мөхәммәтшин узган ел 17,6 миллион сум керем алган. Чагыштыру өчен, 2016 ел нәтиҗәләре буенча әлеге күрсәткеч 11,3 миллион сум тәшкил иткән. Дәүләт Советы Рәисенең тормыш иптәшенең кереме дә ел дәвамында 5,9 миллион сумнан 9,6 миллион сумга кадәр арткан. Мөхәммәтшиннар гаиләсенең җир кишәрлеге, ике торак йорт, ике фатир һәм ике машина кую урыны бар. Шулай ук Фәрит Мөхәммәтшин – ике автомобиль, кар чанасы һәм мотовездеход хуҗасы.


Татарстаннан сайланган Дәүләт Думасы депутатлары арасында беренчелек Айрат Хәйруллинда. Ел дәвамында кереме 100 миллион сумнан да күбрәккә кимүгә карамастан, ул беренче баскычтагы урынын саклап калган. Дәүләт Думасының аграр мәсьәләләр буенча комитеты рәисенең беренче урынбасары былтыр 168,4 миллион сум акча эшләгән. Хатыны да тырышкан. Аның еллык кереме 5 мең сумга арткан һәм 146 мең сум тәшкил иткән. Хәйруллиннар гаиләсе былтыр 46 мең квадрат метр мәйданлы урман кишәрлеген арендалап торудан баш тарткан.


Икенче урында – “Нәфис” компанияләре төркеме хуҗаларының берсе – Ирек Богуславский. Дәүләт Думасының икътисадый сәясәт, сәнәгать, инновацион үсеш һәм эшмәкәрлек комитеты вәкиленең дә кереме кимегән. 2016 елда ул 154,9 миллион сум акча эшләсә, былтыр 47,5 миллион сум керем алган. Депутатның бер милке дә юк. Хатын-кыз депутат Әлфия Когогина еллык керемен өч тапкыр арттырган һәм өченче урынга күтәрелгән. Былтыр ул 30,2 миллион сум акча эшләгән. Тормыш иптәше, “КамАЗ” генераль директоры Сергей Когогин өчен дә узган ел шактый уңышлы булган, ахры. Аның еллык кереме 45 миллион сумнан 107 миллион сумга кадәр арткан.


Россия Президенты Владимир Путинның узган елдагы кереме турындагы декларациясе әллә ни шаккатырмый. Былтыр ул 18,7 миллин сум керем алган. 2016 елда исә 8,8 миллион сум акча эшләгән булган. Илбашының матбугат сәркатибе Дмитрий Песков әйтүенчә, керемнең артуы җир кишәрлеген сатудан кергән акчага бәйле. Илбашының бер фатиры, гаражы, ике машинасы һәм бер тагылмалы арбасы бар. Россия Премьер-министры Дмитрий Медведев былтыр 8,565 миллион сум акча эшләгән. Алдагы ел белән чагыштырганда, аның кереме үзгәрешсез диярлек. Россия Хөкүмәте вәкилләре арасында иң бай түрә – вице-премьер Александр Хлопонин. Ул былтыр 2,9 миллиард сум керем алган. Түрәнең акча янчыгы бер ел эчендә 300 тапкыр баеган. Баксаң, ул Италиядәге милкен саткан икән. Ә якташыбыз – илнең элемтә һәм массакүләм коммуникацияләр министры Николай Никифоров (5,8 миллион сум) иң аз керемлеләр арасына эләккән. Ул арттан икенче урында.

(“Ватаным Татарстан”,   /№ 55, 17.04.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр