ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 182, 15.12.2018/

“Акча эшләү максатын куймыйбыз”

 
“Татар җыры” фестивале быел “Тагын бер адым” шигаре астында үтәчәк. Бу – яңалыкка, үзгәрешкә, яңа үрләргә һәм юбилей елына якынаюны аңлата, ди оештыручылар. “Татар җыры” халыкара эстрада фестивале быел 22 декабрьдә “Пирамида” концертлар залында унтугызынчы тапкыр узачак. Чараны оештыручылар тамашаның үзенчәлекләре турында матбугат очрашуында сөйләде, кайбер серләрне ачты. 

18-2
tatar-inform.ru

 

Быелгы фестивальнең эчтәлек ягы да, бизәлеше дә, форматы да үзгә булачак. “Татар җыры” фестивале оештыручылары, елдагыча, зур тамаша вәгъдә итә. Чараның режиссеры Максим Скалозубов һәр җырчының чыгышыннан  халык күңеленә үтеп керерлек вакыйга әзерләп өлгертү максатын куйган. “Журналистларның яраткан соравы: быел нәрсә белән гаҗәпләндерәчәксез? Бөтен серләрне дә ачмыйбыз, үзегез килеп күрерсез”, – диде ул. Һәр чыгышны заманча техник алымнар белән бизәмәкчеләр.


“Татар җыры”ның сценарий авторы Гөлназ Сәфәрова тамашаның эчтәлегенә тукталды.


– Сценарийга күбрәк юмор өстәдек, интерактивлар керттек. Ягъни тамашачы белән аралашу көтелә, алар да бу фестиваль эченә кереп китәргә тиеш. Бүләкләү ягыннан да үзгәрешләр булачак. Халыкны ялыктырмас өчен, башта берничә номинация игълан итәчәкбез, аннан соң гына сыннар тапшырачакбыз. Фестиваль җиңел, бер сулышта, рәхәт үтсен иде, – диде ул.


Сәхнәдә дүрт алып баручыны күрәчәкбез. Айваз Садыров белән Гөлназ Сәфәрова янына тагын ике кеше өстәләчәк. Әмма кемнәр икәнен оештыручылар сер итеп калдырды.


“Татар җыры”нда барлыгы 26 номинация булачак. Җырчылар исемлеге билгеле, әмма кайсы, нинди номинациядә “барс” сынын алачагын әлегә әйтмиләр.


Җыр фестивалендә Эльмира Кәлимуллина беренче тапкыр чыгыш ясарга әзерләнә.


– “Татар җыры” фестивале безнең татар милләтен, татар музыкасын башка дәрәҗәгә күтәрде. Синең җырың радиода яңгырый, халык күңелендә ниндидер хисләр уята. Бу артистны тагын да илһамландыра, күтәренке кәеф өсти. Быел “Мин сине Ходайдан сорадым” җыры белән чыгыш ясыйм. Чарага килсәгез, җыр барышында эксклюзив видеоөзекләр күрәчәксез, – дип фикерләре белән уртаклашты ул.


Журналистларны “Татар җыры”ның бюджеты да кызыксындырды. Быел ул 11 миллион сумны тәшкил итә. “Барс-Медиа” татар медиа группасының башкарма директоры Динә Гәрәева әйтеп үткәнчә, бу сумма рәсми партнерлардан, билет сатудан килгән акчадан һәм “Барс-Медиа” компаниясенең шәхси фондыннан алына.


“Татар җыры” ел саен җырчыларның киенү рәвешләре белән дә шаккатыра иде. Быелгысы да искәрмә булмаска тиеш. Мәсәлән, Иркәнең образы аклы-каралы төсләрдән, әмма бик үзенчәлекле булачак; Хәмдүнә Тимергалиевага да зур игътибар биргәннәр. “Хәмдүнә апа – эстрадабыз легендасы. Ул – сәхнәдә 50 ел. Быел өр-яңа образда чыгыш ясаячак. Аның киемен дизайнер Рөстәм Исхаков эшли”, – диде Динә Гәрәева.


Әлеге чара табыш китерәме соң? Бу сорауга Динә Гәрәева болай дип җавап бирде:


– “Татар җыры” фестивале, 19 ел үткәрелеп килү дәверендә, беркайчан да коммерция проекты булмады, акча эшләү максатын куймады. Бу – безнең компаниянең еллык эшенә йомгак, иң яхшы артистларны халыкка күрсәтү.
Чарага билет алып килә алмаган тамашачылар өчен “ТМТВ” каналы гадәттәгечә туры трансляция оештырачак.

(“Ватаным Татарстан”,   /№ 178, 07.12.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр