ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 42, 23.03.2019/

Эше барның ашы бар


Республика авылларында 400 меңнән артык шәхси хуҗалык исәпләнә. Аларның күбесе яшелчә, җиләк-җи­меш үстерә, терлек асрый. Авылда үз шөгылен булдыручылар, фермер хуҗалык­лары, кооперативлар саны да арта.

4-2  
Тик менә дәүләт ярдәме генә азрак. Күпләр аның нинди эш-гамәлләр өчен һәм күпме икәнлеген дә төгәл белми. Шуны исәпкә алып, Татарстан Авыл ху­җалыгы һәм азык-төлек министрлыгы авылда кече эшмәкәрлек бе­лән шөгыль­ләнүчеләрнең 2019 елда нинди юнәлешләр буенча субсидия алырга хокукы булуын искә төшерә.


Күпләп терлек асраучыларга кече фермалар төзү бу­енча чыгымнарның бер өлешен кайтаруга, савым сы­ерлар, сөт кәҗәләре, кә­җә бә­тиләре асрауга, күпләп каз, үрдәк, күркә, бройлер че­­беш­ләре сатып алуга, нә­селле таналар алуга, нә­сел­ле атлар асраган өчен дәү­ләт­тән субсидия алырга мөм­кин. (Тулырак мәгълүмат алыр өчен ТР Авыл хуҗа­лыгы һәм азык-төлек министрлыгына – (843) 221-77-40, (843) 221-76-54 һәм 221-76-55 телефоннары аша, “ТР авыл хуҗа­лыгы кооперациясен үстерү буенча компе­тенция­ләр үзәге” (843) 221-77-40 һәм үзегез яшәгән районның авыл ху­җалыгы идарәлә­ре­нә мө­рәҗәгать итәргә кирәк.)

 

Ришат Хәбипов: “Авылда яшәүчеләргә ярдәм арта”

Сигезенче тапкыр узучы Бөтенроссия татар авыллары эшмәкәрләре җыены делегатлары Татарстан авыл хуҗалыгы һәм азык-төлек министры урынбасары Ришат Хәбипов белән очрашты.


“Татарстан авылларында үз эшләрен булдырып, намуслы хезмәтләре белән хөрмәт казанучылар бик күп. Бу эшкә гаиләләре белән алынучылар да бар. Эшмә­кәрлекнең иң үтемлесе – үзеңнән соң эшең­не улың яки кызың дәвам итүдә. Җиргә мәхәббәт буыннан буынга дәвам итсә, нә­тиҗәсе зуррак була”, – диде министр урынбасары.


Татарстан авылларында кече һәм уртача эшмә­кәр­лекне җәелдерүгә дәүләт ел саен 2 миллиард сумнан артык акча тота. Узган елда фермер һәм кооперативларга субсидия буларак 878 миллион сум дәүләт ярдәме күр­сәтелгән. Шәхси хуҗа­лыклар да өлешсез калмаган – аларга 528 миллион сум субсидия бирелгән. Быел исә ярдәм күләме тагын да күб­рәк булачак, ди Ришат Хә­бипов.

Әтнә кызы Илсөяр үз эшен бигрәк сөяр

Илсөяр Габделхако­ва­ның гаиләсе, якыннары бе­лән авылда үз эшен булдырып яши башлавына инде 20 елдан артык. Эш­мә­кәр­леккә тотынганына һич тә үкенми. “Бик авыр булса да, үзеңә эшләүнең уңайлы яклары да бар, – ди Илсөяр ханым. – Баштарак, бөтен булган акчабызны җыеп, искереп беткән йөк машинасы сатып алдык. Ти­рә-юньдәге авылларда яшәү­челәргә азык-төлек, төр­ле продукцияләр алып кайтып сата идек. Тора-бара, эш күләме арта башлады. Бүген инде 4 кибетебез бар. Камыр азыклары җитештерү цехы да ачып җибәрдек. Бу эштә хәзер инде балаларыбыз гына түгел, оныкларыбыз да ярдәм итә”.

Минеханов Миңнехановка рәхмәтле

Тукай районы фермерлары әйдаманы Минталип Минехановны Татарстанда гына түгел, тирә-як төбәк­ләрдә дә яхшы беләләр. Төрле һөнәр остасы булуы өстенә, авыл хуҗалыгында һәр яңалыкны тиз арада тотып алуы, фермер хуҗа­лы­гында куллана белүе белән дә дан алган кеше ул. Ә инде юлында нинди дә булса кыенлык килеп чыкса, проблеманы хәл итәр өчен теләсә кайсы түрәнең бусагасын үтеп керә.


– Татарстан авыл хуҗа­лыгы ирешкән уңышларда Президентыбыз Рөстәм Миң­нехановның, Татарстан Премьер-министры урынбасары – авыл хуҗалыгы һәм азык-төлек министры Марат Әхмәтовның өлеше зур. Язгы кыр эшләреме ул, урып-җыю вакытымы, без аларның ярдәмен тоеп эшлибез. Барлык фермерлар исеменнән рәхмәтлә­ребез­не җит­кер­сәгез иде, – ди Минталип Минеханов.

(“Ватаным Татарстан”,   /№ 38, 16.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!