ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 69, 19.05.2018/

//

Латин Америкасында Казан вертолетларын беләләр

 

Кичә Казан Кремлендә Татарстан Президенты Рөстәм Миң­не­ханов Латин Америкасы һәм Кариб утравы илләренең Россия Феде­рациясендәге илчеләре белән очрашты.

 
“Россия Федерациясенең күп­тәннән сезнең илләр белән дустанә элемтәләр урнаштыруы бик мөһим, күп кенә халыкара мәсьәләләр буенча фикерләребезнең бертөрле булуы күзәтелә, барлык юнәлешләр буенча хезмәттәшлекне үстерү омтылышы бар”, – дип билгеләп үтте ТР Президенты дипломатлар белән әңгәмәсендә.

 
Президент Татарстан пред­прия­тиеләре продукциясенең Латин Америкасы һәм Кариб утравы илләре базарында яхшы мәгълүм булуын искәртте. “Бу – иң элек Казан вертолет заводында җитеш­терелә торган ”Ми” вертолетлары. Ярты гасыр эчендә сезнең төбәк­ләргә 350дән артыграк Казан вертолеты “очты”, – дип билгеләп үтте ТР Президенты. – Шулай ук Дакар раллиендә күп тапкырлар җиңгән “КамАЗ” йөк машиналарыбыз турында да әйтми кала алмыйм. Биш ел эчендә сезгә 3324 машина “китте”.

 
Шул ук вакытта, ТР Президенты фикеренчә, икътисади хезмәт­тәшлек мөмкинлекләребезгә туры килеп җитми әле. “Күбрәк аралашырга, мәгариф өлкәсендә хезмәт­тәшлекне көчәйтергә, нәтиҗәлерәк транспорт-логистика схемаларын эшләргә кирәк”, – дип белдерде ул.

 

Италия белән хезмәттәшлек

 

ТР Президенты Рөстәм Миңне­ханов кичә Казан Кремлендә Ита­лиянең Россиядәге Гадәттән тыш һәм вәкаләтле илчесе Паскуале Терраччано белән очрашты.

 
“Италиянең “Пирелли”, “Текнимонт”, “Интеза” кебек компа­нияләре белән бик зур хезмәт­тәшлек тәҗрибәсе тупладык. Алар безнең нефть химиясе, машина төзелеше, авыл хуҗалыгы кебек проектларыбызда катнаша”, – диде ТР Президенты.

 
Шул ук вакытта, Рөстәм Миң­неханов билгеләп үткәнчә, бүген товар әйләнешен үстерү өчен зур мөмкинлекләр бар. “Проектлар кирәк, уртак эшебезне көчәйтергә кирәк. Узган ел йомгаклары буенча үзара сәүдә 23 процентка үскән”, – дип искәртте Р.Миңне­ханов.

 
Очрашуда катнашучылар Россия – Италия мөнәсәбәтләре кысаларында Татарстан белән Италия арасында сәүдә-икътисади һәм гуманитар хезмәттәшлекне үстерү, ныгыту ягыннан алга таба адымнар буенча фикер алышты.

 

Элекке министр тоткарланган

 

Татарстанның элекке вице-премьеры – транспорт министры, мошенниклык гамәлләре буенча шикләнелүче Владимир Швецов тоткарланган, дип хәбәр итә ”РИА-Новости” агентлыгы.

 
“Вазыйфаи вәкаләтләрен арттыру һәм мошенниклык турында җинаять эшен тикшерү кысаларында җинаятьчел эшчәнлекнең яңа эпизодлары ачыкланды. Сорау алганнан соң Швецов тоткарланды”, – дип хәбәр итә агентлык. Аның мәгълүматларына караганда, якын араларда тикшерү органнары шикле затны кулга алу турында үтенечнамә белән судка мөрәҗәгать итәчәк.


Узган елның ноябрендә билгеле булмаган затларга карата вәка­ләтләрен арттыру һәм мошенник­лык турында җинаять эше кузгатылган. Тикшерү барышында Швецов һәм аның улына шик төшкән.

 

Балалар уеннарын карыйбыз

 

Татарстанда “Бәйрәм түгәрәге. Татарстан халыклары бала­ларының традицион уен культурасы. Җырлы-биюле уеннар. Видеохрестоматия” дөнья күрде, дип хәбәр итә Халыклар дуслыгы йортының матбугат хезмәте.


Анда татар, рус, керәшен, чуаш, удмурт, мари һәм мордва халык уеннары тәкъдим ителгән. Проект­ның җитәкчесе – Татарстан Халык­лар ассамблеясе советы башкарма комитеты җитәкчесе Николай Владимиров. Хрестоматияне республика традицион мәдәниятне үсте­рү белгечләре төзегән.


Ул Татарстан Республикасында яшәүче халыкларның теллә­рен саклау, үстерү һәм куллану даирә­сен киңәйтү өлкәсендә проектларны гамәлгә ашыручы иҗ­тима­гый оешмалар өчен ТР Мә­гариф һәм фән министрлыгы гранты кысаларында әзерләнгән.

(“Ватаным Татарстан”,   /№ 53, 14.04.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!