ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 175, 24.11.2017/

Гарипов Зариповка каршы тора алырмы?

 

Беренче булган командага Кубок бирмиләр. Инде тугыз ел дәвамында КХЛда әнә шундый гадәт саклана. Мәскәү ЦСКАсы өченче ел рәттән даими чемпионатта иң күп очко җыючы команда булып танылса да, плэй-оффта җиңелергә мәҗбүр була. Көнбатыш конференциясе финалында СКА белән “Локомотив” очрашачак. Көнчыгышта исә тамашчыны “Ак барс” – “Металлург” уеннары көтә.

4-1

Көнбатышта финалга чыккан командалар шимбә көнне ачыкланды. Белгечләр төп фаворитларның берсе дип ЦСКАны атаса да, мәскәүләр Ярославль уенчыларына каршы тора алмады. СКА исә “Динамо”га бер генә уенда оттырды. Көнчыгышта гамәлдәге чемпион “Металлург” “Барыс”ны 4:0 исәбе белән җиңде. Ә менә “Ак барс” белән “Авангард”ка озак тартышырга туры килде. Омскида узган бишенче уенда хуҗалар 4:1 исәбе белән уңышка ирешкәч, әлеге сериянең җиде очрашуга сузыласын фаразлаучылар да булды. Әмма Зиннәтулла Билалетдинов хәлиткеч уенга ныклап әзерләнгән булып чыкты.

 

Россия хоккееның атаклы комментаторы Сергей Наил улы Гыймаевны искә алу белән башланып киткән очрашуда Зиннәтулла Билалетдинов капитан Александр Свитовны уйнатмады. Һөҗүчемгә ни булган? Җәрәхәт алганмы, әллә баш тренер алдагы уенда җиңелгән өчен чарасын күргәнме – монысын әйтеп булмый. Андый очракларда Билалетдиновның җавабы гел бер төсле була: авырып китте. Ә Свитовның булмавы “Ак барс”ның уенына тамчы да зыян салмады. Матч уртасында “Ак барс” 4:0 исәбе белән алга чыгып, очрашуның язмышы инде хәл ителгән иде. Көндәшләр нәрсә генә эшләмәсен, очрашу плэй-быелгы оффта иң яхшы уенын күрсәткән хуҗалар файдасына төгәлләнде. Иң сөенечлесе шул: Казан командасы керткән биш алканың өчесе Татарстан хоккеенда тәрбияләнгән егетләр – Ткачев, Лукоянов һәм Яруллин исәбендә. Гарипов исә капкасын “коры” килеш саклап калды. “Омскида оттыргач, безнең хакта күп сөйләделәр. Бүген исә утырып сөйләштек тә, бар көчебезне күрсәттек. Көндәшебезгә бер генә мөмкинлек тә калдырмадык”, – диде очрашудан соң Ткачев.

 

Көнчыгыш конференциясенең финалында исә якташларыбызга гамәлдәге чемпион “Металлург”ка каршы торырга туры киләчәк. Бу команданың нәрсәгә сәләтле булуын барысы да белә, тик каршы тора алучылар гына сирәк. Магнитогорск командасы дигәч, “Ак барс” тамашачысы иң элек Данис Зариповны искә ала. Татарстан хоккей сөючеләре аны әле дә ярата һәм бу мәсьәләдә Казан уенчыларының берсе дә Данисны уздыра алмый. Зарипов исә “Ак барс”ка узган уеннарда икеләтә тырыша. Быелгы даими чемпионатта ул күрсәткечләре белән гаҗәпләндермәде. 56 очрашуда 16 алка кертеп, иптәшләренә 29 нәтиҗәле пас бирде. Ә менә плэй-офф башлангач, хәлиткеч уеннарның төп каһарманын әверелде. Данис 9 очрашуда 11 алка кертте һәм 6 пас нәтиҗәле пас бирде. 

 

Сүз уңаеннан, КХЛның махсус комиссиясе Зариповны плэй-оффның икенче өлешендәге иң нәтиҗәле һөҗүмче дип тапкан. Иң ышанычлы капкачы исеменә исә “Ак барс”тан Эмиль Гарипов лаек булды. Конференция финалында кайсысы өстенрәк булыр: Гариповмы, әллә Зариповмы? Финал очрашулары 24 февральдә башлана. Беренче ике уен Магнитогорскида булачак. “Ак барс” белән “Металлург” соңгы тапкыр плэй-оффта 2010 елда очрашты. Көнчыгыш конферциясенең ярымфиналы иде ул. Ул вакытта казаннар 3:2 исәбе белән өстен чыкты, ахырда исә Гагарин Кубогын яулады.

(“Ватаным Татарстан”,   /№ 40, 21.03.2017/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

5-1

Видеохәбәр

112