ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 85, 22.06.2018/

Чиста булыр


Россия Президенты В.Путин 2018 елны – Волонтер елы дип игълан итте.
Быел май аеннан “үзирек­леләр” (волонтерлар) эшчән­легенә кагылышлы федераль закон да гамәлгә керәчәк. Пар­ламентыбызның экология, табигатьтән файдалану, агросәнәгать һәм азык-төлек сәясәте комитеты утырышында әлеге закон нигезен­дә быел Татарстанда нинди эш­ләр башкарылачагын тә­гаен­ләделәр.

2-2
Үзиреклеләр хәрәкәте, әлбәттә, беренче чиратта яшь­ләр белән бәйле, шуңа күрә утырышка Казанның дүрт югары уку йортыннан студентлар чакырылуы табигый иде. Парламент Рәисе Ф.Мөхәммәтшин әйтмешли: “Казан – студентлар башкаласы һәм яшьләрне игелекле эшләргә тарту кирәк. Ә үз­иреклеләр хәрәкәтенең мөм­кинлекләре бик зур һәм бу хәрәкәткә ярдәм итү дәүләт яшьләр сәясәтенең өстенлек­ле юнәлеше булырга тиеш”.


Бер уйлаганда, волонтерлык, ягъни үзиреклеләр хә­рә­кәте элек бар иде инде, тик һәр эштә ярдәм күрсәтергә әзер торучыларны без башкача, “тимурчылар” дип атый идек. Дөрес, аларның вазыйфасы өлкәннәргә, ялгызак­ларга ярдәм итү, ишегалларын көрәү-себерү, утын әзер­ләү, чишмә-коелардан су ташу кебек эшләр белән чик­ләнгән иде. Әмма өлкәннәр­гә, ярдәмгә мохтаҗларга хөр­мәт белән карарга, үзара яр­дәмләшеп яшәргә, рәхим-шәф­катьле булырга өйрәтте ул.


“Тимурчылар” хәрәкәте бүгенгә хәтле яшәгән булса, заман үзгәрү белән бергә аларның эшчәнлекләре төр­ләнми калмас иде әле. Мин тимурчылар турында сүз катмаган да булыр идем, гомер-гомергә үзара ярдәмләшеп яшәүнең кешелек дөньясына хас асыл сыйфат икәнен утырышта чыгыш ясаучылар искә төшерде. Алар әле атак­лы хәйрияче, бар эшләгәнен балалар, мохтаҗлар белән бүлешеп яшәгән Әсгать ага Галимҗановны да искә тө­шерделәр. Әсгать абый ке­бек­ләр хәзер юк шул инде, бәлки, булмас та. Чөнки замана башка, кем әйтмешли, “бушка сандугач та сайрамый” торган заманда яшибез. Тик шулай да үзләре теләп хакимият кулы җит­мәгән эшкә алынучылар һәр заманда кирәк. Бүген “үзи­реклеләр” хәрә­кәте көч-куәт ала бара кебек. Чыгыш ясаучылар әйтүенчә, 2014 елда үзиреклеләр ар­мия­сендә­ге­ләр саны 42560 кеше булса, 2017 елда 46900­гә җиткән. Утырышта катнашкан Россия Думасы депутаты Равил Хөснуллин мондый саннарга саграк, ышанмыйчарак карады. Шуның өстенә, үзирек­леләр хәрәкәтендә кат­на­шу­чыларны бүләкләү кирәк­леген дә әйтте. Дөрес, алар­ның хезмәтен бәяләү турында федераль законда да язылган, тик гомуми сүзләр белән генә. Равил әфәнде әйтмешли, үзиреклеләр хә­рә­кәтендә аеруча актив катнашканнарга, мәсәлән, югары уку йортларына кергәндә, нигә баллар өстәмәскә!


Шунысын да әйтик, үз­иреклеләр спорт ярышларын үткәрүдә генә түгел, социаль, медицина, экология һ.б. өл­кәләрдә дә катнашалар һәм яшәешебезнең һәр өлкәсен­дәге проблемалар белән якыннан танышалар. Бу аларга яңадан-яңа күнек­мә­ләр алырга, белем эстәргә яр­дәм итә.


Әйткәнемчә, үзирек­ле­ләр хәрәкәте җәелә бара, тик аңа юнәлеш бирергә кирәк. Бу уңайдан Экология һәм табигый ресурслар министрлыгы каршында иҗтима­гый оеш­малар эшчәнлеген коор­динацияләү Үзәге оеш­ты­рыр­га кирәк, диделәр. Шуның өстенә әлеге министрлык базасында табигатьне саклау юнәлешендә эшләүче­ләр өчен махсус курслар оеш­тыру кирәк, дигән тәкъ­дим дә булды.

(“Ватаным Татарстан”,   /№ 37, 17.03.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр