ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 69, 19.05.2018/

Иртән – эленке, төштән соң – салынкы


Апрель ае тәмамланып барса да, 2 миллион 929 мең гектардан артык көзге культураларның – 0,2, күпьеллыкларның – 3,5, туңга сөрелгән һәм пар җирләренең  нибары 0,1 проценты гына тырмаланган. Көзге культуралар һәм күпьеллыкларны ашлау да узган елның шул чоры белән чагыштырганда сүлпәнрәк.

2-4
Мөмкинлекләргә килгән­дә, күп хуҗалыклар, матди кыенлыкларга да карамас­тан, язгы кыр эшләрен кулдан килгәнчә зур әзерлек бе­лән каршыларга тырыша. Югары сыйфатлы орлык, ашлама, ягулык-майлау материаллары, запас частьлар һәм башка кирәк-яраклар туплана.


Күп хуҗалыкларда техника, тагылма җайланмаларны төзәтү, яңарту эшләре көздән үк башлана. Андыйларга язын күпкә җиңелрәк. 9-13 апрельдә хуҗалыкларда тех­никаның язгы кыр эшлә­ренә әзерлеген кабул итү барышы да моның шулай икән­леген тагын бер кат раслады.


Республиканың байтак районнары, аерым алганда, Актаныш, Арча, Әтнә, Балтач, Сарман, Зәй һәм Тукай районы хуҗалыклары язгы кыр эшләрен яхшы әзерлек белән каршылый.


Шул ук вакытта төрле сә­бәпләр белән техниканы вакытында һәм сыйфатлы итеп әзерли алмаган хуҗа­лыклар әле бүген дә язгы кыр эш­ләренә ныклап керешеп китә алмый. Вакыт бар әле, янәсе. Әмма, язның бер көне  ел туйдыра, дип тә тик­мәгә әйтел­мидер. Зәй районы хуҗалык­лары көзге культуралар һәм күпьеллыклар мәйданын ашлауны тулысынча башкарып чыкканда, Югары Ослан ху­җалыкла­рында бу күрсәт­кеч нибары 1 процент тәш­кил итүен ничек аңларга? Алабуга, Мамадыш, Баулы, Балык Бистәсе, Чирмешән һәм башка кайбер район хуҗалык­ларында да көзге культураларны ашлау, тырмалау эш­ләре ике аякка аксый.


Әйтергә кирәк, язгы кыр эшләре быел башка еллардагыдан да катлаулырак шартларда уза. Зур өметләр баг­лап, ел дәвамында көтеп алган ашлык, шикәр чөгендере, кайбер башка продукция­ләр­гә бәя булмау – бер хәл. Төп табыш чыганагы – сөт җитештерүнең дә кереме кимегәннән-кими барганда, хуҗалыклар ашлама, запас частьлар, сыйфатлы орлык һәм башка кирәк-яракларны арзан чагында ук алып куя да алмый.


Әмма зарланудан файда юк. Бүген булган мөмкин­лек­ләрне тулырак файдалану турында кайгырту кирәк. Дө­рес, банктан ташламалы кредит алу җиңел түгел. Моның шартлары да байтак. Әмма салымнарны вакытында тү­ләп барган  Әтнә, Саба, Буа һәм Кукмара районнары ху­җалыклары ташламалы кредит мөмкинлекләреннән фай­даланырга өлгергән.


3 миллион гектарга якын сөрү җирләрен тырмалау, ашлау, чәчү һәм башка төрле язгы кыр эшләрен вакытында һәм югары сыйфатлы итеп башкарып чыгу өчен шактый акча кирәк булачагын яхшы белсәләр дә, кайбер хуҗа­лыклар  җиргә мөмкин кадәр азрак биреп, мул уңыш алмакчы. Шул ук ашламаны гына алыйк. Зәй районы хуҗа­лыклары һәр гектарга 115 килограмм ашлама кертергә җыенганда, Әгерҗе районында гектарга 11,5 килограмм ашлама белән ничек итеп мул уңышка ирешмәк­челәр? Апас, Кама Тамагы, Чирмешән, Яңа Чишмә, Бө­гелмә һәм башка кайбер районнарда да ашлама әлегә бик аз күләмдә тупланган. 


Әмма, ни генә дисәк тә, мул уңышның нигезендә үз эшен белеп, күңел биреп башкаручы игенчеләребез тора. Әлеге фикерне соңгы елларда авыл хуҗалыгының барлык тармаклары буенча республикада әйдәп баручы Зәй районы җитәкчесе Рәзиф Кәримов та хуплый.


– Техниканы язгы кыр эшләренә әзерләү белән бергә, механизаторларның осталыгын арттыру да ки­рәк. Булдыклы механизаторлар әзерләү, аларны матди кызыксындыру гына да җитми. Заманча техника, сыйфатлы орлык һәм башка кирәк-яракларны булдыру, сөрү җирләрен тиешенчә эшкәр­тү, ашлау, барлык тех­нология таләпләрен үтәү белән бергә һәр механизатор үзеннән торганны күңел биреп башкарганда гына уңышка ирешеп була, ди Рәзиф Гали улы.     

(“Ватаным Татарстан”,   /№ 58, 24.04.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!